گھر میں سلنڈر پھٹنے سے والدین سمیت 2 بچے جاں بحق

بورے والا میں کمرے کے اندر گیس سلنڈر پھٹنے سے 4 افراد جھلس کر جاں بحق ہوگئے جس میں ماں باپ اور 2 بچے شامل ہیں۔

تفصیلات کے مطابق یہ افسوسناک واقعہ فرید ٹاؤن کے علاقے میں پیش آیا جہاں گھر کے اندر کمرے میں سلنڈر پھٹنے سے آگ بھڑک اٹھی جس کے نتیجے میں 4 افراد جھلس کر جاں بحق ہوگئے جن میں دو معصوم بچے اور ان کے والد اور والدہ شامل ہیں۔

ریسکیو حکام کا کہنا ہے کہ دانش اپنی فیملی کے ساتھ سو رہا تھا اور 6 ماہ کے بچے کے لیے دودھ گرم کرنے کی غرض سے کمرے میں سلنڈر کو چلایا گیا جو دھماکے سے پھٹ گیا اور کمرے میں آگ پھیل گئی جس کی زد میں آکر پوری فیملی جاں بحق ہوگئی۔

اس کے علاوہ تھرپارکر میں بھی ایک افسوسناک واقعہ پیش آیا ہے جہان گاؤں کویا میں گھر سے 5 افراد کی لاشیں ملی ہیں، جاں بحق افراد میں میاں بیوی، 2 بیٹے اور بیٹی شامل ہیں۔

پولیس کا اس حوالے سے کہنا ہے کہ باپ نے تین بچوں اور بیوی کو زہر دینے کے بعد خودکشی کی ہے۔